கறுப்புப் பணம் குறித்த தகவல்களை இந்திய அரசுடன் பகிர்ந்துகொள்ளும் வகையில் தங்கள் நாட்டு நாடாளுமன்றத்தில் சட்டத்திருத்தம் கொண்டு வரப்படும்.



வெளிநாட்டு வங்கிகளில் உள்ள இந்தியர்களின் கறுப்பு பணத்தை மீட்டு நாட்டு மக்கள் ஒவ்வொருவர் வங்கிக் கணக்கிலும் 15 லட்ச ரூபாயை செலுத்துவோம் என தேர்தல் அறிக்கையில் உறுதியளித்தது பாஜக. மத்தியில் ஆட்சியை பிடித்ததும் கறுப்பு பணத்தை மீட்பதில் பாஜக வேகம் காட்டவில்லை என்கிற விமர்சனங்களை எதிர்க்கட்சிகள் தொடர்ந்து முன் வைக்கின்றன. இந்நிலையில் கறுப்பு பணத்தை பதுக்கி வைப்போருக்கு அதிகபட்சம் 10 ஆண்டுகள் வரை சிறை தண்டனை அளிக்க வகை செய்யும் மசோதா கடந்த புதன் கிழமை மாநிலங்களவையில் நிறைவேறியது. 

இந்த விவகாரத்தில் மற்றொரு முக்கிய திருப்பமாக இந்தியா வந்துள்ள சுவிட்சர்லாந்து நிதியமைச்சர் ஜோகன் சினெய்தர் அம்மான் மத்திய நிதியமைச்சர் அருண்ஜேட்லியை டெல்லியில் நேற்று சந்தித்துப்பேசினார். பின்னர் செய்தியாளர்களிடம் பேசிய சுவிட்சர்லாந்து நிதியமைச்சர் கறுப்பு பணம் பதுக்கி வைத்திருப்போர் குறித்த விபரங்களை திருடப்பட்ட ஆவணங்களின் அடிப்படையில் இந்தியாவுடன் பகிர்ந்துகொள்வதில் உள்ள சட்டச் சிக்கல்களை சுட்டிக்காட்டினார். எனினும் இதனை சரிசெய்யும் வகையில் சுவிட்சர்லாந்து நாடாளுமன்றத்தில் சட்டத்திருத்தம் கொண்டுவரப்படும் என்றும் அவர் கூறினார். 

கறுப்பு பணம் வைத்திருப்போர் குறித்த விபரங்களை உறுதிப்படுத்துவதை சுவிட்சர்லாந்து அரசு துரிதப்படுத்த வேண்டும் என நிதியமைச்சர் அருண் ஜேட்லி தெரிவித்தார். வெளிநாட்டு வங்கிகளில் இந்தியர்களின் கறுப்பு பணம் சுமார் 70 லட்சம் கோடி ரூபாய் அளவிற்கு உள்ளதாக தகவல்கள் கூறுகின்றன. அவற்றில் பெரும்பாலான தொகை சுவிட்சர்லாந்து நாட்டு வங்கிகளில் பதுக்கி வைக்கப்பட்டுள்ளதாகக் கூறப்படுகிறது. இந்நிலையில் கறுப்பு பண மீட்பு விவகாரத்தில் சுவிட்சர்லாந்து நிதியமைச்சர் ஜோகன் சினெய்தர் அம்மானின் இந்திய வருகை மிகவும் முக்கியமானதாகக் கருதப்படுகிறது.

No comments:

Post a Comment